Nigeria: Minyɔ́ xù nɔvisunnu jɔja awe to Ondo
Nɔvisunnu jɔja awe, Jelad Oluwaranakinse xe nyí oxwe atɔ́n mɛvi , kpó Jenson xe nyí nɔvisunnu oxwe atɔ̀n mɛvi etɔn kpó kú to minyɔ́ xe fiɔ oxwé yětɔn to Akure, ayimatɛn Ondó tɔn, to azangaagbe.
Mɛxe tin to finɛ lɛ ɖɔ ɖɔ Xwési Deborah Oluwaranakinse, xe nyí onɔ̀ yětɔn, sú yé dó xɔmɛ bo tɔ́nyí nadó xɔ̀ núɖùɖù. Hwenue é tɔ́n sɔ́n xwégbè, minyɔ́ ɖé bɛjɛeji to oxwé lɔ gbè. Kɔmɛnu lɛ tɛnkpɔn nadó ɖoalɔtena minyɔ́ lɔ bo hwlɛn ovi lɛ gán, cigbǎ yé ma sɔgan wàmɔ gba.
Ɖokpó to mɛxe tin to finɛ lɛ mɛ ɖɔ ɖɔ ”mǐ nɔ ylɔ azɔ́nwatɛn minyɔ́-cítɛn tɔn, cigbǎ to ojlɛ xe mɛ yé wá, hwenu ko fɛ́. Ovi lɔ lɛ ko kú.” Hwɛhwinhwɛ́n minyɔ́ lɔ tɔn ma ko nyí nyinywɛ gba.
Ocyɔ́ visunnu awe lɔ lɛ tɔn nyí hinhɛn yì glasé-xɔ̀ xe mɛ yè nɔ ze ocyɔ́ lɛ dó mɛ to l'hôpital universitaire des sciences médicales to Akure.
Xwési Funmilayo Odunlami xe nyí xoyiɖɔtɔ kponɔ lɛ tɔn to Akure, dó nujijɔ awubla tɔn lɔ xya to nyɔnuzangbe. É ɖɔ ɖɔ, “visunnu awe lɔ lɛ nyí súsú dó oxɔ̀ lɔ mɛ gbɔn onɔ̀ yětɔn xe tɔ́n nadó yì xɔ̀ núɖùɖù dali. Azɔ̀ lɔ xú yé bɔ minyɔ́ fiɔ yé. Mǐ to nǔxe hɛn minyɔ́ lɔ wá lɛ gbeje kpɔ́n.”
Comments
Post a Comment